یاشام، یاردیم ائتمک دیر


آخرین موضوع ها: --- افتتاح سایت شصت برگ (مجموعه آثار کلاسیک) --- انتشار کتاب کوله بار تنهایی --- این هیولا تو را دوست دارد --- سلسله مقالات «قابلیت های سبک نیمایی» --- بخش نقد آزاد انجمن --- طرح نقد و بررسي آثار --- فراخوان های ادبی --- قوانین انجمن شعر و ادب پارسی ---

ارسال پاسخ 
 
امتیاز موضوع:
  • 0 رای - 0 میانگین
  • 1
  • 2
  • 3
  • 4
  • 5
یاشام، یاردیم ائتمک دیر
04-08-2016, 01:03 AM
ارسال: #1
یاشام، یاردیم ائتمک دیر
تانری نین آدی لان
یاشام، یاردیم ائتمک دیر
پارا کیفیمی آچدیم، ایچینده کی پارالاری سایماق اوچون و سایماغا باشلادیم:
10
20
30
40
45 مین.
کیفیمده کی پارالار دکترا گئتمک اوچون یئتر لی ایدی. دکترون ویزیتی لاپ چوخ اولسایدی 35 مین اولاجادی.
-آنا تئز اول بئواخ دا قالاریخ ها!
-تلسمه وقتینده یئتیشه جاییق.
بورنوم دا پرابلم وار ایدی، بیلیردیم گره ک عملیات اولام، اونا گؤره ده چوخ آدام لاردان یاخچی بیر دکترون آدرسین سؤروشموشدوم و هپسی بو دکتری سؤیله میشدی.  دکترون کلینیکه یاخین لاشیردیق. کلینیکین بیناسینا نئچه آتدیم قالان دایاندیم آنام دا منه چاتا. او آن دا بیر آریق و اوجا بؤی کیشی کی قوجاغیندا دا بیر چؤجوق وار ایدی یانیمدان کئچدی و اونون دالیسی بیر اوجا بوی و آریق خانیم، گول لو گول لو چادیرا اؤرتموشدی، اوزلرین گؤره بیلمه دیم، اما گئییم لرین دن بیلدیم شهرلی ده ییر لر، فیکریم دکتر و عملیات یانیندا ایدی، بیر آن گؤزوم خانیمین ایاقلارینا ساتاشدی، ایاغین دا باشماق یوخیدی، ترلیک(دمپایی) گیمیشدی. فیکریمین قاریشیق اولدوغو اوچون چوخ دقت لی اولا بیلمه دیم، آنام نان کلینیک اولان بینایا گیردیک، اوجا بوی کیشی و اوجا بوی خانیم بینا دا اولان دکترلارین آدلارینا باخیردیلار، ایلک پله دن یوخاری چیخمامیشدیک که اوجا بؤی کیشی دئدی: "خانیم باغیشلایین، بو بینا دا اوشاق دکتری وار؟"
اولارا ساری باخدیم، گوزلری حزن لی ایدی، کیشی نین قوجاغیندا کی اوشاق یاتمیشدی، اولارین ساوادسیز اولماقلارین آنلادیغیم اوچون دایاندیم و بیر بیر دکترلارین آدلارینا باخدیم و دئدیم: "یوخ بو بینا دا اوشاق دکتری یوخدی."
آتدیم آتدیم ایلک پله یه که کیشی یئنی دن دئدی:"باغیشلایین اشاغی بینا لار دا نئجه؟ اوشاق دکتری وار؟"
کیشی یه ساری باخیب دئدیم:"بیلمیرم، دایانین گئدیم باخیم."
بینا دان چیخدیم، هاممی بینا لاری بیر بیر نظردن کئچیتدیم، ایلک بینا دا یوخدی، ایکینجی ده یوخیدی اما اوچونجی بینا دا گؤزوم بیر دکترین آدینا ساتاشدی، سئوینه سئوینه اولارا ساری گئتدیم که بینا دان ائشیح ده منی بئکلیردیلر. کیشی یه دئدیم بوردا اوشاق دکتری وار. کیشی سئوینمه دی، بیلمه دیم نیه؟!، آناما ساری باخدیم اودا بینا دان چیخیب منی بئکلیردی، اونا ساری گئتدیم و ایکیمیز ایچه ری گیردیک، پله لری یوخاری چیخیردیک کی آنام دئدی: "یازیخ قادین!" بیلمه دیم نیه بو سؤزی دئییر.
دکترون کلینیکی نین قاپی سین آچیب ایچه ری گیردیک، کاتیبه (منشی) ساری گئتدیم، ویزیت پاراسی نین نئچه اولدوغونی سوروشدوم و او دا 30 مین اولدوغونی سؤیله دی، کیفیمی آچیب پارانی چیخاردیب قادینا وئردیم، بیزدن قاباخ یینه خسته وار ایدی. اؤتورجاق لارین اوستونده اؤتوردوک و دکترین چاغیرماغینی بئکله دیک، آنام دان سؤروشدوم:" نیه او قادینا یازدیخ دئدین؟"
آه چکدی و دئدی: "سن که بینا دان چیخدین، کیشی یه سؤیله دیم اوشاغینی آپارا صحیه یه (بیر خسته خانا اوشاقلار اوچون)، دئدی آپارمیشام باخماییبلار، سوروشدوم نیه؟ کیشی دئدی جیبیم ده پارام یوخدی، بئش مین پارا اینان کیمسه اوشاغیما باخمادی، ایندی گلمیشم بورایا بلکه بیری الله رضاسی اوچون اوشاغیما علاج ائلییه. خانیمی سی نیسگیل لی باخیردی، غم گؤزلرین نن تؤکولوردی، هشزادی یوخیدی سؤیلییه اما گؤزلری هر نه نی آنلاتیردی."
اوره گیم غم ایله دؤلدی، کئشکه تئز بیلردیم، اوندا کیفیم ده اولان بوتون پارالاری او کیشی یه وئرردیم، اما ایندی بو قالان 15 مین نن هانسی دکتر اوشاغی درمان ائلردی؟
کاتیب آدیمی چاغیردی و ایچه ری گیردیم، اؤتورجاق دا اؤتوردوم، دکتر یاش لی بیر آدام ایدی، خسته لیغیمنن سؤروشدی و من ده بورنوم دا پرابلم اولماغی سؤیله دیم. دکتر معاینه یه باشلادی و سی تی اسکنیمه باخدی، تام بئکله دیغیم کیمی اولدی، دئدی گره عملیات اولاسان، دکترا دئدیم: "عملیاتا حاضیرام، نواخ و هانسی خسته خانا؟"
دئدی: "من چوخ دان دی دا جراح لیق ائله میرم، اما کئسسین گره ک جراحلیق اولاسان، آیری یاخچی دکترلار دا وار اولارنان دا دانیش انشالله توختایاجاقسان."
حالیم بیراز بؤزولدی، کلینیک دن چیخدیق، اوره گیم ده دئدیم او کیشی نی گؤرسم کیفیم ده کی پارالاری اونا وئره جاغام، آنام دا اوره گینده بونو سویلیردی، بیلیردیک آزدی اما دا چاره یوخیدی، هئچ اولماسا بیراز الین نن یاپیشاردی، ایکیمیزین پارالاری ویزیته و داوا لارینا یئترلی اولا بیلردی، ائشیهه چیخدیک، گؤزوموز دولاندی، هر یئره باخدیق، بینا لاری دولاندیخ اما او کیشی دن ایز قالمامیشدی، آنام نان بیر بیریمیزه باخدیق،  ایکیمیزی ده غم باسدی، کئشکه وقتین ده بو ایشی گؤرردیک، کئشکه من دکترا گئتمییردیم کئشکه اللرین دن یاپیشاردیق، کئشکه بیز آللاهین اَلی اولاردیق یاردیم ائتمک اوچون! کئشکه ... کئشکه ... کئشکه ...!!!
اینسانلیغی تثبیت ائتمک اوچون  یاشام دا آز بئله بیر آن لار اولار که بیز اونو شک ایلن الدن وئردیک! عمرومون سؤنونا جان بو آنین پیشمانلیغی بؤینومدا اولاجاق!!!
 

سؤن 

 

 

 

Her şeyin bir sonu var
YAŞAMINDA
Önemli olan geride kalanlara
Güzel şeyler birakabilmekdir
یافتن تمامی ارسال‌های این کاربر
نقل قول این ارسال در یک پاسخ
ارسال پاسخ 


پرش به انجمن:


کاربران در حال بازدید این موضوع: 1 مهمان